ሚኒስትሯ ኢትዮጵያውያን በታሪክ የተሳሰሩና እንደ “አለላ ቀለም” በልዩነት የደመቁ ህዝቦች መሆናቸውን ጠቅሰው፣ ሀገሪቱ የሚዳሰሱና የማይዳሰሱ ቅርሶችን አጣምራ የያዘች “ክዳን አልባ ሙዝየም” መሆኗን አስረድተዋል። እነዚህ ሃብቶች የጥንት ስልጣኔ አሻራና የወደፊት የብልፅግና ተስፋ መሆናቸውንም አክለዋል።

 

ጊፋታ ከሀገሪቱ ብርቅዬ እሴቶች አንዱ መሆኑን የገለጹት ክብርት ሰላማዊት ካሳ፣ በዓሉ የክረምት መውጣትንና የአዲስ ዘመን መባቻን የሚያበስር ታላቅ ባህላዊ ክንውን መሆኑን ገልጸዋል። በዓሉ የወላይታ ህዝብ አካባቢውን ከቆሻሻ፣ ልቡን ደግሞ ከጥላቻና ከጥል በማንፃት በፍቅር ማዕድ የሚሰባሰብበት ልዩ ዕለት መሆኑን አብራርተዋል።

​

በመጨረሻም፣ የጊፋታ በዓል በዩኔስኮ መመዝገቡ የሀገሪቱን ባህላዊ ፀጋዎች ለዓለም ለማስተዋወቅ ትልቅ ዕድል እንደሚፈጥርና የሽማግሌዎች ምርቃት የሚፈስበት ይህ እሴት ተጠብቆ ለትውልድ መሻገር እንዳለበት መልዕክታቸውን አስተላልፈዋል።